A Praza 23 de novembro e o Pazo da Cultura acollerán mañá os actos conmemorativos do Día de Narón

xoves, 22 de Novembro de 2018

O Concello festexará mañá o seu festivo local, o Día de Narón. 

Desde hai 25 anos o 23 de novembro é festivo na cidade, debido a que é dese mesmo día, pero do ano 1837 cando se rexistra a primeira acta do Concello, localizada na parroquia de San Xiao. A Praza 23 de novembro e o Pazo da Cultura convertiranse novamente este ano nos escenarios nos que se desenvolverán as actividades do programa do Día de Narón, nas que se convida a participar a tódalas veciñas e veciños.

A partir das 12.00 horas e ao longo de todo o día poderase ver na Praza 23 de novembro unha Mostra de instrumentos tradicionais que elaborou o alumnado dos Obradoiros de construción de instrumentos do Padroado da Cultura. Así mesmo, na citada ubicación entre as 12.00 e as 12.45 terá lugar o espectáculo Os Trotasongs, da compañía Conticánticos, protagonizado por Iria Estévez e Gonzo Piña e desde as 12.45 ata as 13.15 actuará o Grupo de Música Tradicional do Padroado da Cultura. Tamén na Praza 23 de novembro, entre as 12.30 e as 15.00 e pola tarde de 17.00 a 19.00 estará funcionando unha gran filloeira –con capacidade para elaborar un milleiro por hora- que se poderán degustar de balde.

Ao mediodía o Pazo da Cultura acollerá a partir das 13.30 o acto de entrega dos premios do X Concurso de Pintura Cidade de Narón, que estará presidido pola alcaldesa, Marián Ferreiro, e que repartirá un total de 2.850 euros en premios. 

Pola tarde a programación continuará na Praza 23 de novembro, co espectáculo Cores, contos e rock and roll, de 17.30 a 18.45 horas e protagonizado por Paco Cerdeira, Pakolas, e Laura Romero.

Os actos do Día de Narón rematarán coa XXX Gala do Deporte de Narón, que dará comezo ás 21.00 horas no Pazo da Cultura e no transcurso da que se recoñecerá o traballo de varios deportistas e se nomeará ao Mellor Deportista do ano 2018.