Juan Casal Mera, veciño de Ferrol, obtivo o primeiro premio do "VIII Concurso de Fotografía Cidade de Narón"

venres, 22 de Decembro de 2017

“Freixeiro Blues” é o título da imaxe presentada por Juan Casal Mera á oitava edición do Concurso de Fotografía Cidade de Narón que obtivo o primeiro premio deste certame.

Juan Casal Mera, veciño de Ferrol, obtivo o primeiro premio do "VIII Concurso de Fotografía Cidade de Narón"

Tralo reconto da puntuación do xurado, do que formaron parte os fotógrafos Kiko Delgado, de El Correo Gallego; Jesús G. Taboada, propietario do estudo F64 Fotógrafos e Daniel Alexandre, de Diario de Ferrol, Juan Casal, veciño de Ferrol, alzouse cun premio dotado económicamente con 750 euros, entregado o martes 19 ás 13.00 horas no Concello.

O segundo e o terceiro premio deste certame recaeron en dous veciños de Narón. Francisco Javier Rodríguez Fariñas conseguíu o segundo coa imaxe titulada “Casona San Román”, e José Antonio Serantes Varela o terceiro con “Vas a mirarme?”, dotados con 300 e 150 euros, respectivamente. A calidade técnico artística, a orixinalidade e a representatividade do concello de Narón foron os tres parámetros que valorou o xurado á hora de puntuar as imaxes presentadas.

A concelleira de Turismo recordou que do total de fotografías presentadas a este concurso, 139, se seleccionaron as outras nove que obtiveron maior puntuación para ilustrar o calendario de sobremesa que editará o Concello para o ano 2018. “Queremos agradecer un ano máis o gran respaldo que está obtendo este certame fotográfico, non só entre a veciñanza de Narón, senón tamén doutros concellos da comarca e da provincia que cada ano presentan imaxes relacionadas coa nosa cidade para participar”, destacou Hermida. A edil naronesa indicou que nesta ocasión se recibiron fotografías de persoas de concellos como Fene, Pontedeume, As Pontes e A Coruña, entre outros, “o que amosa o gran seguemento que ten esta convocatoria entre os afeccionados e profesionais da fotografía”.

Hermida destacou o feito de que “con este tipo de convocatorias, desde o goberno local tratamos de dar a coñecer dun xeito diferente, neste caso a través da fotografía, algúns rincóns máis ou menos coñecidos da nosa cidade, que en materia de Turismo ten moito que ofrecer”.

As imaxes seleccionadas para o calendario de sobremesa poden verse na galería de imaxes do concurso e na conta de Instagram da Concellería de Turismo.